رقم العضوية 232957

و هذه معلومات أخرى تفصيلية عن شخصيتي :
الحمد لله رب العالمين من قبل و من بعد العوده من جديد ثقيله جداً
ماحب اتكلم كثير من خلال الملف لاكن اضطريت لتوضيح العام منعاً لبعض التواصل و الرسائل الغير مجديه او الي كلها اساءه و شخصنه.

- ❌ بدايه لا تتواصل معي اذا كانت شروطك
مسيار و زواج في الظل وغير معلن - تجارب مقابلات قبل الزواج - انفتاحيه انحلال - تنازلات عن اركان الزواج الطبيعيه و الاساسيه - زواج بنيه طلاق ،
لا عندي فلوس اصرف على نفسي ولا عندي بيت استقبلك فيه لاني مابفتحه فندق خاص لك و لغيرك - مانزوج بدون وليي .

- انا مو عقيم ولا عندي و لله الحمد والشكر مشاكل لاصحيه ولا نفسيه ولا مانع من الارتباط . و اي مشاكل بقولها لصاحب النصيب ماراح اخدعه في شي إن شاء اللّه . و هو يقول اذا فيه اشكاليات معه، الحوار الجيد بدون غموض قد يكون أحد حلول .

- الرغبه في رجل عقيم سليم صحياً و عقلياً و نفسياً ، ومقتنع وراضي ببدايه جديده في حياته و ارتباط جديد و انسانه تبغى تكمل معه. يؤمن و مستعد بعائله مكونه من شخصين فقط وتكمل الي باقي من شباب و شيب.

- سبب ليه ابغى عقيم فهذا ينقال و يتناقش فيه ضمن الرسائل لصاحب الشأن فقط لاغير فاتمنى بعض الأخوان و الاخوات عدم سؤالي و رغبتي في عقيم ، الأخوات الي لها رغبه في عقيم اللّه يرزقك و يرزقنا لاكن ترى الموضوع مو منافسه.

- ترى ماني من القوقاز و القاره الروسيه وبقايا المغول والغرب الاوروبي ! بعض الأعضاء عليهم اسئله و توسع في التفاصيل و يبغى يعرف أدق الأمور كأني أعرض نفسي، عيب يا اخوان ترى مو للبيع ولا انت للبيع عندك نظره شرعيه حق لك وحق لي. مطلوب شويه حياء ونقاش بدون تعدي للحدود .

- بختصار بياضي بياض عادي فاتحه مائل للقمحي مو البياض الي في بالكم ، جمالي عادي طبيعي مو ملكه جمال تطيح الطير من السماء، الواحد يجلس يوصف امنياته اذا انتهى لقيتها باربي الي في باله او مقارنات ظالمه ما تترقع !!

- لك حق السؤال عنا ولنا بالمثل ،امر بديهي
- يهمني صلاتك عقيدتك رزقك الحلال كرم اخلاقك بعد نظرك طيب اصلك و نسبك همتك و عزيمتك نظافتك الشخصيه حسن مظهرك بالمعقول بار بوالديك، مرونتك ثم مرونتك ثم مرونتك.
- ماعندي برستيج خانق ولا اسلوب معيشي تافهه ولا تبعيه لأحد ولا يهمني الي خارج البيت كثر داخله ولا افضل الانسان ذكر او انثى النكدي المتشائم الظالم المستعلي محور الكون سطحي الرأي سخيف المنطق علم بدون حكمه مال بدون مبداء ، مذهبه على مذهب غيره ، لا اريكم الا ماارئ واسمعكم الا ما اسمع ، منعدم المروءه.

- وسامتك قامتك الاجتماعيه وضعك المالي العالي جداً او التعليمي جداً سيارتك الفخمه ، كبكك و ساعتك و مسبحتك الفخمه ما تغريني هذي الأمور يهمني المخبر لا المظهر ، بيسعدني نجاحك اكيد وبشجعك للأفضل لاكن لا تجعل هذي الأمور محور حياتك و أساسها ، هذي الامور نجاح لشخص ذكر او انثى لاكن احياناً تكون نقمه و كبرياء و الشخص مابيرتاح في حياته متى اخذ وضع السطحيه والاستحقاقيه العاليه و الانانيه التي لا تطاق.

- فيني امور سلبيه و من جهه اخرى انسانه محافظه بسيطه من عائله بسيطه ، اميل للنقاش و الحوار
مطلعه متطلعه متجدده غير كامله وغير مثاليه طويله بال وسيعه صدر متفاءله فيني من العفويه و الجنون و الروح المرحه الكثير و فيني من الكرامه و الجديه وعزه النفس وحشيمتها الكثير الكثير فالي يشوف ان عفويتي وجنوني قله ذوق بالنسبه للمرأه او فيها قله احترام مع الزوج فلا راح اناسبه ابداً ابداً.

- لا انا بالشخص المثالي جداً ولا السيئ جداً
و الإنسان مرآه للإنسان الي بيعاشره
عامل بمثل ماتحب ان تعامل
كن لي زوج اكون لك زوجه
كن صديق اكون صديقه
كن عشيق اكون عشيقه
كن حليل و خليل اكون حليله وخليله
كن و اكون ، ابني و ابني معك
اسقى وبتلاقي
و الحياه الزوجيه مابين تقارب جسدي و عاطفي و احترام وتقدير و موده و رحمه و احسان و توازن لاكن انت/ي توقف نجاح الزواج على شي واحد فقط فهذا قمه الغباء
- البعض الي يقول انا انسان مزواج ما استبعد اتزوج بعدك او قبلك، محاولات جس النبض اللّه يوفقك عزيزي دامه بالحلال ماعندي مشكله هذا امر فتنه على بنات حواء المشاركه شينه و العدل على الرجال صعب لاكني برضى اذا كان بالحلال زواج معلن صريح وانت قادر من كل الجهات تعرف تختار الى بتشارك اثنين حياتهم وتكون الثالثه ماهو تصكها اي زواجه من اي وحده من اي دوله باي طريقه ثم تبلشني و تبلش عمرك، اللّه يوفقك اخي المسلم ترى الموضوع ماهو لعب وتجربه ورغبه مؤقته واعجاب خلال لحظه و ربي احل اربع لي و عنتريات وزوجات و طلاقات وتضحك عليهم و يضحكون عليك ، العشوائيات ماراح يأكلها غيرك زمام الأمور مو دايم في يدك.
- وصلت 40 مايعني اني من القواعد من النساء فلعل وعسى البعض يفهم هذا الأمر بسعه افق ويطلع من القوقعه الي هو فيها بدال ماهو يمسكها عليه وعلى غيري ورقه ضغط للموافقه و محاوله اذلال.اصلحكم اللّه.

قناعاتي و توضيحاتي وقلتها قد تناسب البعض او قد تنفر البعض
((نحتاج الي يشاركنا الحياة بشكل طبيعي بالحلال وفي الحلال ولا غيره، اللهم لاتذرني فرداً وانت خير الوارثين ، اللهم التقي العفيف الغني الحليم الرحيم المحسن اللهم السكن و السكنى و العفه و الألفه ، اللهم رضاك و كرمك ،اللهم وفق كل من يبتغي الحلال من رجال و نساء))
ما انتظر رجل و زوج كامل الكمال لله وحده.. لاكن الشخص الي يتقي الله ويحسن .

شكراً لكم و السلام ختام